Bij de brandweer

Veur een week of 5,6,7, misschien bi’w een weekien mis,
kwam hier Albert van der Weide die als bij de brandweer is.
Nou, en dat’t zuk lillijk weer was en dat regen zo gauw verveelt,
en dat als de zun d’r bij komp dat dat nogal aorig scheelt.

Nou, en da’w de tuun zo schier hadden en het gres zo mooi d’r of
Jong oh jong en wat jao’n weelderige vruchten in de hof.
En hie prees oes en hie pochde, en toen hadden wij’t wal al deur:
van der Weide komp waarschienlijk...waorens anders veur !

Refr: Bij... de brandweer zuukt ze jongs van Jan de Wit,
bij... de brandweer zuukt ze volk waor pit in zit..
Want... een brandweerman giet zelden deur het lint
En...zodoende da’w daor bar geschikt veur bint!

Net toen van der Weide wieder wol , scheut’t hum in de zin:
Ja, hie zeg, kiek, bij de brandweer he’w nog’n man of wat te min.
En non dachd’e an oes beide, want wij waren zo vaak bij hoes.
Oh ’k weet vast, zee van der Weide, zulks dat was net wat veur oes.

Refr:

Nou, wij zegt tegen van der Weide:
Brandties blussen wee’w niet van.
Want a’w eerlijk bint dan steekt wij liever non en dan wat an.
Lege puuten, erpelrangen, verlopen eulie, ’n aole baand,
Wij hebt eigenlijk altied wal ’t ien of’t aander, in de braand !

Nou, da’s mooi, zee van der Weide, want dan bi’j van’t goeie slag.
En zo kwamen wij met oes beide bij de brandweer op een dag.
En wij kregen lange stevels en een helm en ’n zwatte jas.
En Geert die vruug nog of dat soms veur op de brommert was.

Refr:

En toen van de week op’n middag, dunkt mij um een uur of veer
toen gung zo-in-iens de pieper, mam oh man wat gung’t er heer!
Wij waren allebeide stom toevallig op de zölfde stee,
toen he’w eerst ies lusterd wel zien piepertien het hardste dee.

Refr:

Daornao bi’w op hoes an scharreld ,
ja want jongs het was mij wat,
wij hadden allebei de schiere striepkaordboksem nog um’t gat.
En wij kwamen langs tante Geessien
en die zat zo mooi veur’t glas,
En die wol vanzölf nog geern even weten hoe of’t met oes was.

Och, wij zegt:wal aorig goed heur.
Nou, zie zeg: Met mij is’t pet.
Ik heb aal zun gruwelijk jokkerij hier under’t corselet.
En zie luut’t oes even zien en oh, het was een mal gezicht.
En toen muzzen aal die veterties vanzölf ok nog weer dicht.

Refr:

Tante Geessien luten wij achter en wij lupen deur hen hoes.
Gauw een aander striepkaordboks an,
eerst nog even under de douche.
En daornao wat bruggies smeren en een kan vol koffie met,
want in’n hoes dat in de braand stiet wordt miestal gien koffie zet.

En zo kwamen wij’n zettien later bij de brandweergarage an
en daor luup, za’k je vertellen, toch al mienig brandweer-man.
En wij rupen: Haa, die jongens, dit wordt oeze eerste keer!
Maar toen was de brandweerauto d’r al vief minuten weer !

Refr:

En toen gung’t even an de borrel. Want, zo zee de
commandant, dat is altied de gewoonte nao zun mooie dikke brand.
En hoe’t daornao wieder gaon is kregen wij later niet meer met.
Maar oes Geert wuur ’s mörgens wakker in tan’ Geessien zien corset !

Refr: (2X)